Երևանի Ա. Տեր-Գևոնդյանի անվան №1 երաժշտական դպրոցում տեղի ունեցած աղմկահարույց միջադեպը խորհրդանշական շարունակություն է ստացել։

Արցախից 11-ամյա Եվա Դանիելյանի՝ «Մենք ենք, մեր սարերը» («Պապիկ-Տատիկ») հուշարձանը պատկերող նկարը, որը հուլիսին հեռացվել էր դպրոցական ցուցահանդեսից, լեռնագնացների կողմից բարձրացվել է Արարատի գագաթ։

Դպրոցի վարչակազմը նկարը հանելու որոշումը հիմնավորել էր նրանով, թե Արցախ վերադարձի գաղափարին նվիրված աշխատանքը «չի համապատասխանում ցուցահանդեսի թեմային»։ Մինչդեռ ծնողներն ու հասարակական գործիչները տեղի ունեցածը որակել էին որպես գրաքննության դրսևորում։ Միջադեպից հետո աղջկա ուսուցչուհին աշխատանքից ազատման դիմում էր ներկայացրել՝ հայտարարելով, որ չի կարող աշխատել մի վայրում, որտեղ մանկական ստեղծագործությունը գնահատվում է որպես «հակապետական քայլ»։



Արարատի գագաթ նկարը բարձրացրած նախաձեռնության մասնակիցների խոսքով՝ իրենց քայլը պատասխան էր տեղի ունեցածին և աջակցություն՝ երիտասարդ նկարչուհուն։ Նրանք ընդգծել են, որ հիշողությունը, հայրենի հողի հանդեպ սերն ու ստեղծագործական ազատությունն անհնար է արգելել որևէ որոշմամբ։ Կազմակերպիչները կոչ են արել Եվային չվախենալ և շարունակել ազատորեն ստեղծագործել՝ հույս հայտնելով, որ այս դեպքը հասարակության մեջ լայն քննարկման առիթ կդառնա ազատ արտահայտման իրավունքի շուրջ։