Սևանա լճի ափին հուլիսի 26-ին պաշտոնապես մեկնարկել է «Seaside Startup Summit Armenia 2026» վրանային սամմիթը, որն այս տարի ևս իրականացվում է ՀՀ բարձր տեխնոլոգիական արդյունաբերության նախարարության համաֆինանսավորմամբ։

Մինչև օգոստոսի 1-ը անցկացվող այս ծրագրի կազմակերպման համար պետական բյուջեից հատկացվել է 1 միլիարդ 200 միլիոն դրամ։
Բացման արարողությանը ողջույնի խոսքով հանդես է եկել ՀՀ ԲԱՏՆ նախարար Մխիթար Հայրապետյանը։ Նա ընդգծել է, որ տեխնոլոգիական ոլորտի ու ստարտափների աջակցությունը պետության համար ռազմավարական նշանակություն ունի։ Նախարարի խոսքով՝ սամմիթը յուրահատուկ հարթակ է, որտեղ ծնվում են նոր գաղափարներ, ձևավորվում են գործընկերային ամուր կապեր և կերտվում է ապագայի տեխնոլոգիական էկոհամակարգը։ Նա նաև նշել է, որ միջոցառման ավարտից հետո մասնակիցները հեռանում են հարուստ փորձառությամբ ու գիտելիքներով՝ սկիզբ դնելով հաջողության նոր պատմությունների։
Մեկ շաբաթ շարունակ սամմիթը մեկ տեղում է համախմբելու տարբեր երկրների ստարտափ հիմնադիրների, ներդրողների, տեխնոլոգիական ընկերությունների ներկայացուցիչների և ոլորտի առաջատար փորձագետների։ Մասնակիցներին սպասվում են ինտենսիվ աշխատանոցային փուլեր, կրթական ծրագրեր և պիչինգ-մրցույթներ, որոնք նոր հնարավորություններ են բացելու տեխնոլոգիական ոլորտի երիտասարդ նախաձեռնությունների համար։