Հոկտեմբերի 5-ին՝ Ուսուցչի տոնի առթիվ, Եղիշե Չարենցի տուն-թանգարանը Հայաստանի գրողների միության հետ համատեղ արդեն չորրորդ տարին անընդմեջ մեկ հարկի տակ համախմբեց չարենցասեր ուսուցիչներին ու աշակերտներին՝ հանրապետության տարբեր մարզերից։

«Չարենցյան ամառ» ամենամյա պատանեկան նախագծի շրջանակում 14–17 տարեկան դպրոցականները երեք ամիս շարունակ ուսուցիչների առաջնորդությամբ աշխատել են իրենց նախընտրած թեմաների շուրջ։ 2026 թվականի խորագիրն էր «Չարենցը և արվեստը»։



Պատանիների հետազոտությունները բազմազան էին՝ Չարենցը կերպարվեստում, երաժշտության, ճարտարապետության մեջ և այլ ոլորտներում։



Աշխատանքներն իրականացնելիս աշակերտներն օգտվել են գրական-գիտական հարուստ աղբյուրներից, ժամանակակիցների վկայություններից ու առցանց շտեմարաններից։Ամփոփիչ միջոցառման ընթացքում բոլոր մասնակիցները ստացան հավաստագրեր։



Նախագծի հաջորդ կարևոր փուլը հետազոտությունների հրատարակումն է․ աշխատանքներն առանձին ժողովածուով լույս կտեսնեն 2027 թվականին։



«Չարենցյան ամառ» կրթահետազոտական նախագիծը ստեղծվել է Եղիշե Չարենցի նախաձեռնած «Մանուկ ընթերցողների կոնֆերանս» գաղափարի հիման վրա։