Մերձավոր Արևելքում իրավիճակը ժամ առ ժամ ավելի է թեժանում։

Եմենի իրանամետ հութիները հայտարարել են Սաուդյան Արաբիայի դեմ անհապաղ ծովային էմբարգո սահմանելու մասին՝ որոշումը որակելով որպես պատասխան քայլ իրենց երկրի «անարդար ու ռեպրեսիվ պաշարմանը»։
Այս հայտարարությունը, սակայն, լոկ տեղային հակամարտություն չէ. այն ուղղակի սպառնալիք է համաշխարհային տնտեսությանը։ Իրանի ճնշմամբ հութիները պատրաստվում են փակել ռազմավարական կարևորություն ունեցող Բաբ էլ Մանդեբի նեղուցը, եթե ԱՄՆ-ն շարունակի հարվածներ հասցնել իրանական էներգետիկ ենթակառուցվածքներին։
Եթե նեղուցն իրոք ամբողջությամբ փակվի, աշխարհը կկանգնի լուրջ նավթային ճգնաժամի առաջ։ Սաուդյան նավթի արտահանման մեծ մասը պարզապես կարգելափակվի տարածաշրջանում, ինչը 7%-ով կկրճատի նավթի համաշխարհային մատակարարումները՝ էլ ավելի խորացնելով Պարսից ծոցի պատերազմի պատճառով ստեղծված էներգետիկ դեֆիցիտը։
Սաուդյան Արաբիան դեռևս լռում է և պաշտոնական արձագանք չի տվել, սակայն պարզ է մեկ բան՝ համաշխարհային առևտրի և էներգակիրների մատակարարման ուղիները հայտնվել են լուրջ հարվածի տակ։
Նյութը՝ ըստ Reuters-ի