Ադրբեջանական լրատվամիջոցների փոխանցմամբ՝ սեպտեմբերի 22-ից իրանական ավիաընկերությունները ժամանակավորապես դադարեցրել են թռիչքները դեպի Ադրբեջան։ «Ադրբեջանական ավիաուղիներ» (AZAL) ընկերությունից «Ազերթաջ»-ին պարզաբանել են, որ այս որոշումը պայմանավորված է Իրանի դեմ ԱՄՆ-ի կողմից սահմանված նոր պատժամիջոցներով, որոնք թիրախավորում են հենց ավիացիոն ոլորտը։ Հիշեցնենք, որ Վաշինգտոնն սահմանափակումների նոր փաթեթի մասին հայտարարել էր սեպտեմբերի 8-ին։ ԱՄՆ ֆինանսների նախարարության տվյալներով՝ պատժամիջոցների տակ են հայտնվել իրանական ավիացիայի գործունեությունն ապահովող 36 ֆիզիկական և իրավաբանական անձինք։ Բացի այդ, ԱՄՆ ֆինանսների նախարար Սքոթ Բեսենթը նախօրեին զգուշացրել էր, որ սեպտեմբերի 23-ից իրանական փոխադրողները միջազգային չվերթներ իրականացնելիս կբախվեն խիստ խոչընդոտների․ իրանական ինքնաթիռներ սպասարկող, դրանց վառելիք մատակարարող կամ համագործակցող օտարերկրյա օդանավակայաններն ու ընկերությունները նույնպես հայտնվելու են ամերիկյան պատժամիջոցների վտանգի տակ։ Հատկանշական է, որ սեպտեմբերի 22-ին «Iran Air»-ը հայտնել էր, թե Բաքու, Ստամբուլ և Նաջաֆ թռիչքների դադարեցման վերաբերյալ որևէ պաշտոնական ծանուցում դեռ չէր ստացել։