Երկրի մթնոլորտում լույսի բեկման (ռեֆրակցիայի) պատճառով սեպտեմբերի 23-ի աշնանային գիշերահավասարի օրը ցերեկվա տևողությունը մի փոքր ավելի երկար կլինի 12 ժամից։ Այս մասին հայտնել են Մոսկվայի պլանետարիումից։

Աշնանային գիշերահավասարի պահին Արեգակը հատում է երկնային հասարակածը՝ Հյուսիսային կիսագնդից անցնելով Հարավային։ Հյուսիսային կիսագնդի երկրներում, այդ թվում՝ Հայաստանում և Ռուսաստանում, դրանով ազդարարվում է աստղագիտական աշնան սկիզբը (սեպտեմբերի 23-ին՝ Երևանի ժամանակով 04:05-ին, Մոսկվայի ժամանակով՝ 03:05-ին)։

Թեև գիշերահավասարի օրը ցերեկն ու գիշերը համարվում են հավասար, իրականում ցերեկը 12 ժամից երկար է ստացվում։ Պատճառը մթնոլորտային ռեֆրակցիան է․ մթնոլորտում արևի ճառագայթների բեկման հետևանքով Արեգակի դիսկը հորիզոնում երևում է իր իրական դիրքից մոտ 1.5 աստիճան ավելի բարձր։ Արդյունքում մենք արևածագը տեսնում ենք մի փոքր շուտ, իսկ մայրամուտը՝ ավելի ուշ։

Միջին լայնություններում այս երևույթի պատճառով ցերեկը գիշերվանից երկար է տևում մոտ 8-11 րոպեով։ Օրն ու գիշերը վերջնականապես կհավասարվեն գիշերահավասարից 2-3 օր անց, որից հետո ցերեկվա տևողությունը աստիճանաբար կկրճատվի՝ շարունակվելով մինչև ձմեռային արևադարձ։