Մեծի Տանն Կիլիկիո կաթողիկոս Արամ Ա-ն հայտարարություն է տարածել հույս հայտնելով, որ «իրական» Հայաստանի մասերը Շուշիի ճակատագրին չեն արժանանա՝ «խաղաղութեան կեղծ շպարի ետին...»։

Իր ֆեյսբույքնա էջում գրառմանը կից հրապարակելով տեսանյութեր Արամ Ա-ն նշել է․
«Խոր ցավով ու ընդվզումով դիտեցինք սոցիալական ցանցերը ողողած այս տեսանյութերը։ Հայաստանի «բարեկամները» պարում են Շուշիում և «հիացմունքով» դիտում ու լսում, թե ինչպես են մեր սրբերի աղոթքով, նահատակների արյունով և ժողովրդի ստեղծագործ ոգով դարերի ընթացքում կանգնեցված մեր եկեղեցիներն ու պատմամշակութային կոթողները ներկայացվում որպես ալբանական կառույցներ։ Պատմության ի՜նչ ահավոր խեղաթյուրում մեր աչքի առաջ...։
Իրոք, ընդվզեցնող մի երևույթ, որը մեր անմիաբանության և անհեռատես քաղաքականության հետևանքն է։ Ցավալի երևույթ, որը մեզ պետք է մղի ինքնագիտակցության և համախմբման՝ մեր հայրենիքի ու ազգի գերագույն և ընդհանրական արժեքների, շահերի ու իդեալների շուրջ։
Հույս ունենք և աղոթում ենք, որ «իրական» Հայաստանի մասերը՝ Շուշիի ճակատագրին չեն արժանանա՝ խաղաղության կեղծ շպարի հետևում...»։