Ամերիկյան զինված ուժերը, մի քանի օր տևած հարաբերական դադարից հետո, նոր հարվածներ են հասցրել Իրանի տարածքին։

Վաշինգտոնն այս գործողությունները ներկայացնում է որպես վճռական պատասխան Մերձավոր Արևելքում տեղակայված ամերիկյան զորքերի դեմ Թեհրանի իրականացրած հարձակման փորձին։ Սրան նախորդել էր ԱՄՆ նախագահ Դոնալդ Թրամփի հայտարարությունն այն մասին, որ Հորդանանում ամերիկյան ռազմաբազայի վրա իրանական հարձակումից հետո սպասվում է չափազանց ուժեղ պատասխան։
ԱՄՆ Կենտրոնական հրամանատարությունը (CENTCOM) X սոցիալական ցանցում տեղեկացրել է, որ հարվածները սկսվել են Արևելյան ժամանակով ժամը 20:00-ին և արդեն ավարտվել են։ Գործողության ընթացքում թիրախավորվել են Իսլամական հեղափոխության պահապանների կորպուսի (ԻՀՊԿ) տասնյակ օբյեկտներ, այդ թվում՝ հրամանատարական կենտրոններ, հրթիռների ու անօդաչու թռչող սարքերի արձակման հարթակներ, ինչպես նաև ափամերձ պաշտպանության ենթակառուցվածքներ։
Reuters-ը, վկայակոչելով իրանական աղբյուրները, հաղորդում է երկրի հարավային մի շարք շրջաններում արձանագրված պայթյունների մասին։ Իրանի պետական հեռուստատեսությունը հաստատել է Ահվազում տեղի ունեցած պայթյունները, Tasnim գործակալության փոխանցմամբ՝ հրթիռային հարվածի տակ է հայտնվել Քեշմ կղզու բնակելի թաղամասը, իսկ տագնապալի հաղորդումներ են ստացվել նաև Բուշեհրից, որտեղ տեղակայված է ռուսական կողմի մասնակցությամբ կառուցվող ատոմակայանը։
Սրանք Վաշինգտոնի առաջին հարվածներն են այն բանից հետո, երբ նախագահ Թրամփը ուրբաթ օրը կասեցրել էր 13 գիշեր անընդմեջ շարունակված փոխադարձ ռմբակոծությունները՝ բանակցությունների վերսկսման հնարավորություն ստեղծելու նպատակով։ Միևնույն ժամանակ, Axios-ը նշում է, որ չնայած կողմերը շարունակում են հարվածների փոխանակումը արդեն տասներորդ գիշերն անընդմեջ, դիվանագիտական երկխոսությանն անցնելու հնարավորությունը դեռևս պահպանվում է։