Սննդամթերքի անվտանգության տեսչական մարմինը (ՍԱՏՄ) օգոստոսի 1-ից լայնածավալ վերահսկողություն է սկսում սննդի առաքման ոլորտում։

Հաշվի առնելով բնակչության կողմից առաքման ծառայություններից օգտվելու աճող ծավալները և քաղաքացիներից ստացված բազմաթիվ ահազանգերը՝ տեսչական մարմինը դեռևս տարեսկզբին էր զգուշացրել սպասվող ստուգումների մասին։

Օրենսդրության համաձայն՝ սննդամթերքի հետ անմիջական շփում ունեցող բոլոր աշխատակիցները, այդ թվում՝ առաքիչները, պարտավոր են անցնել նախնական (աշխատանքի ընդունվելիս) և պարբերական (կիսամյակը մեկ անգամ) բժշկական զննություն ու ունենալ սանիտարական գրքույկ։ Գործատուների խնդրանքով՝ շուրջ 2-3 հազար առաքիչների բուժզննման գործընթացն ավարտելու համար տրամադրվել էր ողջամիտ ժամանակ, որն ավարտվում է oգոստոսի 1-ին։

Այդ ամսաթվից սկսած՝ պահանջը չկատարած անձինք և ընկերությունները ենթարկվելու են վարչական պատասխանատվության։ Տեսչական մարմինը նախատեսում է հանրայնացնել ինչպես հայտնաբերված խախտումները, այնպես էլ օրենքի պահանջները բարեխղճորեն կատարած կազմակերպությունների անունները։