Գերմանիայի կանցլեր Ֆրիդրիխ Մերցը, Ադրբեջանի նախագահ Իլհամ Ալիևի հետ համատեղ մամուլի ասուլիսի ընթացքում անդրադառնալով տարածաշրջանային զարգացումներին, հայտարարել է, որ Երևանի և Բաքվի միջև ձեռք բերված համաձայնությունը էականորեն կնպաստի Հարավային Կովկասի առաջընթացին։

Ինչպես հաղորդում են ադրբեջանական ԶԼՄ-ները, Գերմանիայի կառավարության ղեկավարը շնորհավորել է կողմերին 2025 թվականի օգոստոսին Վաշինգտոնում համաձայնագրի ստորագրման կապակցությամբ՝ ընդգծելով, որ խաղաղությունը, անվտանգությունը և կայունությունը կենսական նշանակություն ունեն տարածաշրջանի համար։ Նա նշել է, որ Գերմանիան և Եվրոպական միությունը խորապես շահագրգռված են աշխարհաքաղաքական տեսանկյունից այս կարևոր հատվածի կայունությամբ։

Մերցի գնահատմամբ՝ Հայաստանի և Ադրբեջանի միջև ձեռք բերված պայմանավորվածությունները լայն հեռանկարներ են բացում երկկողմ հարաբերությունների կարգավորման և տասնամյակներ տևած հակամարտության էջը փակելու համար։ Գերմանիայի կանցլերը նաև հավելել է, որ տարածաշրջանային կայունությունը միևնույն ժամանակ լրացուցիչ ազդակ կհանդիսանա տնտեսական համագործակցության ընդլայնման և նոր գործընկերությունների ձևավորման համար։