Երևանի քաղաքացիական դատարանը քննության է առել արցախցի քաղաքական գործիչ Արթուր Օսիպյանի հայցադիմումն ընդդեմ վարչապետ Նիկոլ Փաշինյանի։

Այս մասին ֆեյսբուքյան իր էջում տեղեկացրել է հենց Օսիպյանը։ Հայցվորը պահանջում է պարտավորեցնել Կառավարության ղեկավարին հերքել զրպարտություն համարվող հայտարարությունները և հրապարակայնորեն ներողություն խնդրել։

Գործը վարույթ ընդունելու մասին որոշումը դատավոր Խաչատրյանը կայացրել է հուլիսի 17-ին, ինչից հետո դատարանն արդեն պաշտոնապես ծանուցել է Օսիպյանին դատական գործընթացի մեկնարկի մասին՝ փոխանցելով համապատասխան փաստաթղթերը։ Ծանուցագրով քաղաքական գործչին պարզաբանվել են նաև դատավարության ընթացքում նրա իրավունքներն ու պարտականությունները, այդ թվում՝ ապացույցներ ներկայացնելու, միջնորդություններ անելու և վեճը հաշտությամբ ավարտելու հնարավորությունները։

Հիշեցնենք, որ Արթուր Օսիպյանը ձերբակալվել, ապա կալանավորվել էր մայիսի 18-ին Արաբկիր վարչական շրջանում վարչապետի հետ տեղի ունեցած միջադեպից հետո։ Նրան մեղադրանք է առաջադրվել բռնություն գործադրելու հրապարակային կոչերի, բռնությունը հրապարակայնորեն արդարացնելու կամ քարոզելու, ինչպես նաև խուլիգանության և քարոզչությանը խոչընդոտելու հոդվածներով։ Կալանավայրում Օսիպյանը հացադուլ էր հայտարարել՝ իր բողոքն արտահայտելով Նիկոլ Փաշինյանի հնչեցրած «փախած» որակման դեմ, իսկ արդեն հունիսի 10-ին կայացվել էր նրան ազատ արձակելու որոշում։