Կիրակիները Ստրասբուրգում բնակվող հայերի համար վաղուց դարձել են ոչ միայն հոգևոր, այլև համայնքային կյանքի կարևոր օր։

Հայկական Սուրբ Սարգիս եկեղեցին յուրաքանչյուր շաբաթվա ավարտին իր հարկի տակ է մեկտեղում բազմաթիվ հայրենակիցների, որոնք հայրենիքից հազարավոր կիլոմետրեր հեռու շարունակում են պահպանել իրենց ազգային ինքնությունն ու արժեքները։

Սուրբ և Անմահ Պատարագը մատուցում է հայր Կոմիտասը՝ առ Աստված ուղղված աղոթքով և օրհնությամբ միավորելով հավատացյալներին։



Պատարագի ընթացքում հնչող շարականներն ու աղոթքները ներկաների համար ոչ միայն հոգևոր սնունդ են, այլև հայրենիքի հետ կապը պահպանող կարևոր կամուրջ։



Կիրակնօրյա պատարագներից զատ, այստեղ նշվում են նաև եկեղեցական տոները, կազմակերպվում մշակութային տարբեր միջոցառումներ։ Անցած կիրակի՝ հուլիսի 12-ին, եկեղեցու բակում մեծ շուքով նշվեց Վարդավառը։



Տոնական միջոցառումը համախմբել էր համայնքի բազմաթիվ ներկայացուցիչների՝ վերածվելով հավատքի, ազգային ավանդույթների և միասնականության գեղեցիկ խորհրդի։



Ստրասբուրգի և Ֆրանսիայի Էլզասի տարածաշրջանի բազմահազարանոց հայկական համայնքի համար Սուրբ Սարգիս եկեղեցին հոգևոր կյանքի առանցքն է։



Այն մի վայր է, որտեղ հայրենիքից հեռու ապրող հայերը վերագտնում են իրենց արմատները, ամրապնդում համայնքային կապերը՝ հայրենի եզերքից հեռու, բայց հայրենիքի կարոտն ու սերը միշտ սրտում։