Բանակը խայտառակ անողները դարձել են բանակի դեմքը Փաշինյանը վաբա՞նկ է գնում Ինչո՞ւ է Փաշինյանը նյարդային.Ներքի՞ն, թե՞ արտաքին ազդակներ կան Խաղաղության ճանապարհին մեկ խոչընդոտ կա՝ ընդդիմությունը. Նիկոլ Փաշինյան Հայաստանի ոչ մի ղեկավար երբևէ իրեն թույլ չի տվել ժողովրդի առջև հանդես գալ նման գռեhիկ պահվածքով. Լևոն Տեր-Պետրոսյանը՝ Փաշինյանի մասին Առաջիկա օրերին ջերմաստիճանը կբարձրանա 3-5 աստիճանով, ապա նույնքանով կնվազի Հայաստանը թուրքական կողմի հետ նախատեսում է երկրորդ կամուրջ կառուցել Մարգարայի հատվածում. Արարատ Միրզոյան Սի-Թրամփ-Պուտին հանդիպումն ավարտվել է. այն տևել է 1,5 ժամ
Եպիսկոպոսաց ժողով գումարելու առաջարկ՝ թեմերից

Եպիսկոպոսաց ժողով գումարելու առաջարկ՝ թեմերից

  • 78

«Ո՛չ քաղաքական իշխանությունը, ո՛չ եկեղեցու ղեկավարությունը, ո՛չ հասարակական կարծիքը և ո՛չ էլ լրատվամիջոցները չպետք է իրենց վրա վերցնեն դատարանի դերը

Հայ առաքելական եկեղեցու Դամասկոսի, Գերմանիայի և Իրաքի թեմերի առաջնորդները՝ եպիսկոպոսներ Արմաշ Նալբանդյանը, Սերովբե Իսախանյանը և Օշական Գյուլգյուլյանը կոչ են անում ոչ ուշ, քան 2027 թվականի կեսերը Եպիսկոպոսաց ժողով գումարել Էջմիածնում։ Այս մասին ասված է եպիսկոպոսների համատեղ հայտարարության մեջ, որում նրանք անդրադարձել են ՀՀ վարչապետի աշխատակազմի Հանրային կապերի և տեղեկատվության կենտրոն ՊՈԱԿ-ի պատրաստած՝ Հայ առաքելական եկեղեցում ստեղծված իրավիճակի վերաբերյալ զեկույցին։
Սեպտեմբերի 24-ին հրապարակվեց հակաեկեղեցական արշավի զեկույցն ու «բարենորոգման» քայլերի հերթականությունը։ «Հայ առաքելական եկեղեցում Եկեղեցու փաստացի ղեկավարի և մի շարք բարձրաստիճան հոգևորականների գործունեության հետևանքով առաջացած ճգնաժամի և դրա լուծման ուղիների մասին» վերնագրով զեկույցը 2026 թվականի սեպտեմբերի 24-ին ներկայացրել է ՀՀ վարչապետի աշխատակազմի Հանրային կապերի և տեղեկատվության կենտրոնը (ինչպես հաճախ անվանում են «ֆեյքերի ՊՈԱԿ»-ը. խմբ․)։
 
««Զեկույցում բարձրացված են բազմաթիվ հարցեր, հնչեցված են մի շարք մեղադրանքներ, որոնց գոնե մի մասը հնարավոր չէ անտեսել։ Բայց նույնքան կարևոր է որդեգրել մեկ այլ սկզբունք ևս՝ մեղադրանքը դեռևս ապացուցված փաստ չէ»,- ասված է հայտարարությունում։
Երեք եպիսկոպոսները ստեղծված իրավիճակից դուրս գալու կոնկրետ քայլ են առաջարկել։
«Ըստ այդմ՝ շատ կարևոր է հնարավորինս սեղմ ժամկետներում ապահովել եկեղեցու կանոնական մարմինների բնականոն գործունեության վերականգնումը։ Որպես առաջին գործնական քայլ մեր առաջարկն է՝ մոտ ապագայում` ամենաուշը մինչև 2027 թվականի կեսը, Մայր աթոռում գումարել Եպիսկոպոսաց ժողով։ Մեր արդար սպասումն է, որ Հայաստանի իշխանություններն ապահովեն սփյուռքյան թեմերում պաշտոնավարող եպիսկոպոսների անխափան մուտքը Հայաստան և Հայաստանից վերադարձն իրենց պաշտոնավարման երկրներ»,– նշված է հայտարարությունում։
Եպիսկոպոսների գնահատմամբ՝ զեկույցում տեղ գտած բազմաթիվ պնդումներ հիմնված են հրապարակային հայտարարությունների, մամուլի հրապարակումների, տարբեր անձանց վկայությունների և ասեկոսեների վրա։ Դրանք, ըստ հոգևորականների, կարող են քննարկումների հիմք դառնալ, սակայն ծանր կամ քրեական բնույթի մեղադրանքների դեպքում չեն կարող փոխարինել պատշաճ իրավական քննությանը և դատարանի որոշմանը։
«Ո՛չ քաղաքական իշխանությունը, ո՛չ եկեղեցու ղեկավարությունը, ո՛չ հասարակական կարծիքը և ո՛չ էլ լրատվամիջոցները չպետք է իրենց վրա վերցնեն դատարանի դերը։ Սպասելի է, որ իրավասու դատարանները անաչառորեն քննեն յուրաքանչյուր նմանատիպ մեղադրանք՝ պահպանելով յուրաքանչյուր մեղադրվող անձի կամ հոգևորականի անմեղության կանխավարկածը»,– նշված է եպիսկոպոսների հայտարարությունում։

Միաժամանակ երեք եպիսկոպոսները զգուշացրել են, որ պետական իշխանությունը չպետք է հատի եկեղեցու ինքնավարության սահմանը։
«Հայաստանյայց առաքելական սուրբ եկեղեցին պետության վարչական ենթակառույցը չէ։ Եկեղեցու ներքին կանոնական կյանքը, հոգևոր իշխանության կառուցվածքը և կանոնական մարմինների գործունեությունը պետք է մնան Եկեղեցու ինքնավարության և նրա սեփական կանոնական իրավասության շրջանակներում»,- նշել են նրանք։
Հայտարարության հեղինակները հակասություն են տեսնում նաև կառավարության աշխատակազմի ՊՈԱԿ-ի պատրաստած զեկույցում։ Նրանց խոսքով՝ մի կողմից զեկույցում հայտարարվում է, որ բարենորոգումը պետք է իրականացնի հենց եկեղեցին՝ հոգևորականների և հավատացյալների միջոցով, իսկ պետությունը չպետք է միջամտի եկեղեցու վարդապետական և կանոնական ինքնուրույնությանը, մյուս կողմից առաջարկվում է Ամենայն հայոց կաթողիկոսի հեռացում կամ հանգստի կոչում, կաթողիկոսական տեղապահի ընտրություն և նոր կաթողիկոսի ընտրության նախապատրաստում։ Եպիսկոպոսները չեն վիճարկում պետության իրավասությունը՝ քննելու հնարավոր իրավախախտումները։

Նախորդ հոդվածը
10 հազար դրամ տուգանք երկրորդ գծում կանգնելու համար
Հաջորդ հոդվածը
Սահմանագծման արդյունքում ՀՀ-ի` տարածքային զիջումների վերջին օրերի լուրերը չեն համապատասխանում իրականությանը