Մտահոգիչ պատկեր կրթական համակարգում.Հայ աշակերտները գրագիտության ցուցանիշներով վերջինն են տարածաշրջանում
«Ազատություն» ռադիոկայանի փոխանցմամբ՝ Տնտեսական համագործակցության և զարգացման կազմակերպության (OECD) անցկացրած PISA հետազոտության վերջին տվյալները լուրջ մտահոգության տեղիք են տալիս հայաստանցի 15-ամյա դպրոցականների գրագիտության մակարդակի վերաբերյալ։ Առաջին անգամ մասնակցելով Սովորողների միջազգային գնահատման այս ծրագրին՝ Հայաստանը հայտնվել է տարածաշրջանային հետնապահի դերում՝ զիջելով Վրաստանին, Ադրբեջանին և Թուրքիային, ինչպես նաև հետխորհրդային երկրների մեծ մասին։
Գրանցված ցուցանիշները փաստում են խորքային խնդիրների մասին. հայաստանցի աշակերտների ընդամենը 1%-ն է մաթեմատիկայից արձանագրել լավագույն արդյունք, իսկ բնագիտության և ընթերցանության ոլորտներում բարձր աստիճանի գիտելիքներ գրեթե ոչ ոք չի ցուցաբերել։ Բացի այդ, բազային շեմը հաղթահարած սովորողների համամասնությամբ ևս Հայաստանը բավականին հետ է մնում միջազգային միջին ցուցանիշներից. եթե OECD-ում բնագիտությունից ու մաթեմատիկայից բազային մակարդակը հաղթահարում է աշակերտների 65-74%-ը, ապա մեզ մոտ այդ ցուցանիշը կանգ է առել 28%-ի վրա, իսկ ընթերցանության պարագայում կազմում է ընդամենը 19%։
Այս պատկերն էլ ավելի է բարդանում, երբ դիտարկում ենք աշակերտների վերաբերմունքը կրթական գործընթացի նկատմամբ։ Հետազոտությունը ցույց է տալիս, որ դպրոցականների 15%-ը դպրոց հաճախելն համարում է ժամանակի իզուր կորուստ, մինչդեռ կրթության դերը կարևորող աշակերտները բնագիտությունից նկատելիորեն ավելի բարձր արդյունքներ են գրանցել։ Զուգահեռաբար, մեծանում է թվային տեխնոլոգիաների ազդեցությունը. հայաստանցի աշակերտների 49%-ը շաբաթական առնվազն մեկ անգամ օգտագործում է արհեստական բանականության չաթբոթեր, իսկ դպրոցում թվային սարքերը կիրառվում են ինչպես ուսումնական, այնպես էլ ժամանցային նպատակներով։
Այնուամենայնիվ, գրագիտության նվազումը միայն տեղական հիմնախնդիր չէ. 91 երկրի 760,000 աշակերտների ընդգրկած համաշխարհային զեկույցը վկայում է, որ դեռահասների առաջադիմության ակնկալիքները համատարած անկում են ապրում։ Այս ֆոնին միջազգային ասպարեզում շարունակում են առաջատար դիրքեր պահպանել Արևելյան Ասիայի երկրները, ինչպես նաև Եվրոպայից Մեծ Բրիտանիան ու Էստոնիան։
Աղբյուրը՝ «Ազատություն» ռադիոկայան
Աղբյուրը՝ «Ազատություն» ռադիոկայան
