Ալեքսանդր Մելիք-Ազարյանցը եղել է ամենահայտնի հայ ձեռնարկատերերից մեկը:

Թբիլիսիի կենտրոնում՝ Ռուսթավելի պողոտայում, վերականգնողական և հնագիտական աշխատանքների ընթացքում հայտնաբերվել են հայ ձեռնարկատեր ու բարերար Ալեքսանդր Մելիք-Ազարյանցի հայտնի տան ստորգետնյա հարկերը։

Մելիք-Ազարյանցի տունը կառուցվել է 1912–1915 թվականներին՝ ռուս ճարտարապետ Նիկոլայ Օբոլոնսկու նախագծով, և դարձել Թբիլիսիի առաջին խոշոր բազմաբնակարան շենքը։ Այն իր ժամանակի ամենաառաջադեմ կառույցներից էր. ուներ էլեկտրամատակարարման և ջրամատակարարման ինքնավար համակարգեր, խանութներ, լուսանկարչատուն, գեղարվեստական պատկերասրահ և 20-րդ դարասկզբի համար նորարարական այլ լուծումներ։

Կամարներով, սյուներով ու բարձր թաղակապ ծածկերով ստորգետնյա տարածքները տասնամյակներ շարունակ ծածկված են եղել աղբով և տնտեսական շինություններով։ Մասնագետներն արդեն մաքրել են տարածքի զգալի մասը, ինչը թույլ կտա պահպանել և վերականգնել այս եզակի ճարտարապետական համալիրը։