Ֆրանսիական թանգարանները հայտնվել են կողոպտիչների թիրախում․ ընդամենը մեկ ամսվա ընթացքում երկրում արձանագրվել է թանգարանային երեք խոշոր գողություն։

Ինչպես հաղորդում է Le Parisien-ը, Տարն, Կոտ դ’Օր և Բուն Հռենոս դեպարտամենտներից հափշտակված մշակութային ու պատմական արժեքների ընդհանուր վնասը գնահատվում է միլիոնավոր եվրո։

Առաջին դեպքը գրանցվել է հուլիսի 1-ին։ Տարն դեպարտամենտում գտնվող Մոնտանայի հնագիտական կենտրոնից հանցագործներին հաջողվել է ընդամենը 15 րոպեից էլ պակաս ժամանակահատվածում տարանել մ.թ.ա. 50 թվականով թվագրվող շուրջ 40 հնագույն մետաղադրամ։ Այս կողոպուտի պատճառած վնասը գերազանցել է 120,000 եվրոն։

Ընդամենը չորս օր անց թիրախում է հայտնվել Վենժան-սյուր-Մոդերի Լալիք թանգարանը։ Հանցագործները, կոտրելով վեց ցուցափեղկ, հափշտակել են 27 արժեքավոր զարդ՝ պատճառելով ավելի քան 4,5 միլիոն եվրոյի վնաս։

Շղթան եզրափակվել է հուլիսի 24-ին, երբ կողոպտվել է Շատիյոն-սյուր-Սենի թանգարանը։ Այստեղից գողացվել է անգնահատելի պատմական արժեք ներկայացնող ոսկե վզնոցը, որը պատկանել է մ.թ.ա. 5-րդ դարի հայտնի «Վիքսի տիկնոջը»։

Պարբերականի փոխանցմամբ՝ իրավապահներին արդեն հաջողվել է ձերբակալել կասկածյալներից մեկին, իսկ դեպքերի առթիվ քննությունը շարունակվում է։