Այսօր լրանում է Հայաստանի ինքնիշխան տարածքի նկատմամբ ադրբեջանական լայնածավալ ռազմական ագրեսիայի 4-րդ տարին։

Չորս տարի առաջ՝ 2022 թվականի սեպտեմբերի 13-ին, ժամը 00:05-ից սկսած, Ադրբեջանի ԶՈւ ստորաբաժանումները հրետանային միջոցներից, խոշոր տրամաչափի հրաձգային զինատեսակներից և անօդաչու թռչող սարքերից ինտենսիվ կրակ բացեցին հայկական դիրքերի և բնակավայրերի ուղղությամբ։ Հարձակման ենթարկվեցին Ջերմուկը, Գորիսը, Կապանը, Սոթքը, Արտանիշը և Իշխանասարը։

Որոշ ուղղություններով ձեռնարկելով դիրքային առաջխաղացման գործողություններ՝ ադրբեջանական զինուժը սեպտեմբերի 13-14-ին ընթացած մարտերի հետևանքով ներխուժեց և առաջխաղացում ունեցավ Ջերմուկի, Ներքին Հանդի և Վարդենիսի ուղղություններով։

Սեպտեմբերյան ռազմական գործողությունների հետևանքով հայկական կողմն ունեցավ 224 զոհ, որոնցից 5-ը՝ կանայք, 293 վիրավոր, իսկ ավելի քան 20 հայ զինծառայող գերեվարվեց։