ՀՀ քննչական կոմիտեն տեղեկացնում է, որ 2 քննիչներին ծեծի ենթարկած ոստիկանը և ևս 1 մեղադրյալ կալանավորվել են։

Ըստ ՔԿ հաղորդագրության՝ 2026 թվականի օգոստոսի 21-ին Երևան քաղաքի քննչական վարչության ծանր հանցագործությունների քննության բաժնում նախաձեռնվել և իրականացվում է քրեական վարույթ։ Գործը վերաբերում է ՀՀ ՆԳՆ ոստիկանության համապատասխան ծառայողի, ինչպես նաև նրա հետ ընկերական ու ազգակցական կապերի մեջ գտնվող շուրջ 20 և ավելի անձանց կողմից քննչական բաժնի 2 քննիչներին շենքի դիմաց դաժանաբար ծեծի ենթարկելու և խուլիգանություն կատարելու հանգամանքներին: Վարույթի շրջանակում սկզբում ձերբակալվել էին ոստիկանության վերոնշյալ ծառայողը, ով դեպքի պահին եղել է ալկոհոլի ազդեցության տակ, և նրա հետ ազգակցական կապի մեջ գտնվող ևս 2 անձ:
Կառույցից հայտնում են, որ ՆԳՆ ոստիկանության աշխատակիցն օգոստոսի 21-ին ձերբակալվելուց անմիջապես հետո, ինչպես անձամբ, այնպես էլ պաշտպանի միջոցով վարույթն իրականացնող մարմնին ներկայացրել է հայտարարություններ իրեն ենթադրաբար խոշտանգելու վերաբերյալ։ Դրանից հետո նախաձեռնվել և կազմակերպվել է ձերբակալվածին ինչպես վարչական շենքում, այնպես էլ բուժհաստատություններում բժշկական զննման ենթարկելու գործընթացը, որով հերքվել է ենթադրյալ բռնության դեպքը:
Այժմ քրեական վարույթով կատարվում են անհետաձգելի ապացուցողական և վարութային այլ գործողություններ՝ ենթադրյալ հանցագործության դեպքը բացահայտելու և բոլոր մեղավոր անձանց քրեական պատասխանատվության ենթարկելու ուղղությամբ: