«Մենք պետք է զգուշանանք շեյթաններից և թույլ չտանք նրանց խոչընդոտել մեր հարաբերություններին», — 168.am-ի հետ զրույցում հայտարարել է Կապանում Իրանի գլխավոր հյուպատոս Մորթեզա Աբեդին Վարամինը։

Իրանցի դիվանագետի համոզմամբ՝ Հայաստանի և Իրանի միջև ձևավորված ջերմ հարաբերությունները բացառիկ են և նմանը չունեն այլ պետությունների միջև փոխհարաբերություններում։ Նա ընդգծել է, որ երկու երկրների միջև առկա սերտ կապերը կերտվել են հազարամյակների ընթացքում։

Անդրադառնալով լեզվական ու մշակութային ընդհանրություններին՝ դիվանագետը հարցադրում է արել, թե որքան ընդհանուր բառեր ունի հայերենը անգլերենի կամ ֆրանսերենի հետ։

«Պարսկերենում և հայերենում կան հազարավոր ընդհանուր բառեր։ Սա ցույց է տալիս, որ մենք մեկ ժողովուրդ ենք», — նշել է իրանցի դիվանագետը։

Գլխավոր հյուպատոսը հավելել է, որ ո՛չ Հայաստանն ու հայ ժողովուրդը, ո՛չ էլ Իրանն ու իրանցիները չպետք է թույլ տան օտարներին միջամտել իրենց բարեկամական հարաբերություններին։