Աշնանը Հայաստանում կստեղծվի անձը հաստատող փաստաթղթերի տրամադրման նոր համակարգ, որի շրջանակում քաղաքացիներին կհատկացվեն Եվրոպական Միության անվտանգային չափանիշներին համապատասխանող կենսաչափական անձնագրեր և նույնականացման քարտեր։

Այս մասին օգոստոսի 14-ին տեղի ունեցած մամուլի ասուլիսի ընթացքում հայտնել են Ներքին գործերի նախարարի տեղակալի ժամանակավոր պաշտոնակատար Արմեն Ղազարյանը և Միգրացիայի ու քաղաքացիության ծառայության ղեկավարի ժամանակավոր պաշտոնակատար Նելլի Դավթյանը՝ ներկայացնելով 2026 թվականի առաջին կիսամյակի աշխատանքային արդյունքները։

Ոլորտային բարեփոխումների շարքում ընդգծվել է միգրացիոն ռազմավարության վերանայումը, որտեղ առաջին անգամ ներառվել է քաղաքացիության ինստիտուտը։ ՀՀ-ԵՄ վիզաների ազատականացման երկխոսության գործընթացում ևս արձանագրվել են դրական զարգացումներ․ մայիսին ստացված առաջընթացի առաջին զեկույցում ԵՄ գործընկերները բարձր են գնահատել Հայաստանի ձեռնարկած քայլերը։ Բացի այդ, 2026 թվականի առաջին կիսամյակում պահպանվել է ՀՀ քաղաքացիների սահմանահատումների դրական հաշվեկշիռը՝ կազմելով +1347, ինչը նախորդ տարվա նույն ժամանակահատվածում արձանագրված +8660 ցուցանիշից հետո շարունակում է դրական միտում արտացոլել։

Նոր կենսաչափական փաստաթղթերի ներդրումը կմեկնարկի աշնանը։ Սկզբնական փուլում սպասարկումը կիրականացվի 14 գրասենյակներում, իսկ հետագայում դրանց թիվը կհասնի 23-ի։ Նոր անձնագրի արժեքը սահմանվել է 28 650 դրամ, իսկ նույնականացման քարտինը՝ 5950 դրամ։ Անձնագիրը կտրամադրվի 10 տարի, իսկ նույնականացման քարտը՝ 5 տարի ժամկետով։ Ըստ սահմանված կարգի՝ անձնագիր կարող են ստանալ միայն նույնականացման քարտ ունեցող քաղաքացիները։ Մինչև 16 տարեկան անչափահասներին քարտը տրամադրվելու է ծնողի ցանկությամբ, իսկ 16 տարին լրանալուց հետո այն ունենալը դառնալու է պարտադիր։ Այս օրենսդրական փոփոխությունն ուժի մեջ կմտնի մինչև նոյեմբերի 1-ը, ինչից հետո հին նմուշի փաստաթղթերի տպագրությունը ամբողջությամբ կդադարեցվի։