Ազգային ժողովում «Ուժեղ Հայաստան» խմբակցության ղեկավար Նարեկ Կարապետյանը, դիմելով իշխող «Քաղաքացիական պայմանագիր» խմբակցության պատգամավորներին, հայտարարել է, որ իշխանափոխությունից հետո իրենք պատասխանատվության են ենթարկվելու իրենց իսկ ձևավորած արդարադատության համակարգի կողմից։

Պատգամավորն անդրադարձել է մի շարք քրեական գործերի՝ դրանք որակելով շինծու։ Նա նշել է, որ քաղաքացիներին դատում են քաղաքական հայտարարությունների, օրինակ՝ Ռուբեն Վարդանյանի վերադարձի մասին խոսքերի, աշխատանքի ընդունման սովորական զանգերի կամ ընտանեկան կատակների համար։

Կարապետյանի խոսքով՝ իշխանությունները կարող են ցանկացած գործ ըստ իրենց հարմարեցնել և ներկայացնել, սակայն դրանով չեն կարող համոզել հանրությանը իրենց լեգիտիմության մեջ։ Նա ընդգծել է, որ խորհրդարանում իշխող ուժը չպետք է ունենար նման մեծամասնություն, և այնտեղ պետք է ներկայացված լիներ նաև «Բարգավաճ Հայաստան» կուսակցությունը։