ՀՀ պաշտպանության նախարարությունը հերքում է սոցիալական ցանցերում տարածվող տեղեկությունները, թե 19-ամյա ժամկետային զինծառայող Ա. Հ.-ն դաժան ծեծի է ենթարկվել:

ՊՆ մամուլի քարտուղար Արամ Թորոսյանը Ֆեյսբուքի իր էջում գրել է, որ օգտատերերից մեկի տարածած տեղեկությունը չի համապատասխանում իրականությանը.
«Հորդորում ենք զերծ մնալ կեղծ և սուտ տեղեկություններ տարածելուց, ինչպես նաև հասարակության շրջանում ՀՀ բանակի հեղինակությունը վարկաբեկելուն ուղղված անհիմն փորձերից։
Նման հրապարակումները մոլորեցնում են հանրությանը՝ նպաստելով ապատեղեկատվության տարածմանը։
Զինծառայող Ա. Հ.-ի դաժան ծեծի կամ առհասարակ ծեծի ենթարկվելու վերաբերյալ տեղեկությունները սուտ են. նա զինվորական հոսպիտալ է ընդունվել այլ առողջական խնդրով:
Պաշտպանության նախարարությունը պատրաստ է Մարդու իրավունքների պաշտպանի գրասենյակի ներկայացուցիչներին ուղեկցել հոսպիտալ՝ տեղում իրականությանը ծանոթանալու նպատակով»։