Հայաստանի վարչապետ Նիկոլ Փաշինյանի՝ երկաթուղու կոնցեսիան Հայաստանին վաճառելու խնդրանքը զարմանալի է և «հուզիչ»։ «ՌԻԱ Նովոստի»-ի փոխանցմամբ՝ այս մասին հայտարարել է Ռուսաստանի արտաքին գործերի նախարար Սերգեյ Լավրովը։

ՌԴ ԱԳՆ Սերգեյ Լավրովը նշել է, որ Ռուսաստանի և Հայաստանի փոխվարչապետերի միջև կանոնավոր շփումներ են տեղի ունենում, որոնց ընթացքում կարող են քննարկվել հայկական կողմին հետաքրքրող ցանկացած հարց, այդ թվում՝ «Ռուսական երկաթուղիներ»-ի կոնցեսիոն կառավարմանը հանձնված «Հարավկովկասյան երկաթուղի» ընկերության շուրջ ստեղծված իրավիճակը։

Հիշեցնենք, որ «Հայկական երկաթուղիները» 2008 թվականին հավատարմագրային կառավարման է հանձնվել «Ռուսական երկաթուղիներ» ընկերությանը, իսկ պայմանագրի գործողության ժամկետն ավարտվում է 2038 թվականին։ Վերջին ամիսներին, սակայն, վարչապետ Փաշինյանը հայտարարում է, որ երկաթուղին Հայաստանի սեփականությունն է, և երկիրը պետք է հնարավորություն ունենա այն օգտագործել իր նպատակահարմարությամբ:

Ռուսական կողմն իր հերթին հայտարարել է, որ կոնցեսիոն պայմանագրի վաղաժամկետ դադարեցման դեպքում Հայաստանը պարտավոր կլինի վերադարձնել ռուսական ընկերության կողմից 2008 թվականից ի վեր կատարված բոլոր ներդրումները: