Ռուսաստանի Դաշնությունը պատրաստ է Հայաստանի հետ մտնել կառուցողական երկխոսության մեջ՝ կապված բուսասանիտարական վերահսկողության պահանջների պահպանման հետ։

Այս մասին Юнашев Live Telegram ալիքի հետ զրույցում հայտարարել է ՌԴ փոխվարչապետ Ալեքսեյ Օվերչուկը։ «Խոսքը բուսասանիտարական վերահսկողության պահանջները կատարելու մասին է։ Եվ, բնականաբար, պատրաստ ենք նման կառուցողական երկխոսության։ Ցավոք, մենք տեսնում ենք, որ հայկական կողմում կան որոշ խնդիրներ, և, դրանց վերաբերյալ երկխոսություն է ընթանում»,- ասել է նա։ Օվերչուկը նաև հիշեցրել է ՌԴ գյուղատնտեսության նախարար Օքսանա Լուտի և ՀՀ էկոնոմիկայի նախարարի վերջին հանդիպման մասին, որի ընթացքում ընդգծվել էին Հայաստանից ներմուծվող մրգերի ու բանջարեղենի հետ կապված մտահոգությունները։ «Խնդիրն այն չէ, որ դրանք անորակ են, այլ որ այնտեղ կան վնասատուներ ու հիվանդություններ»,- ճշտել է ՌԴ փոխվարչապետը: