ՌԴ նախագահի մամուլի քարտուղար Դմիտրի Պեսկովն անդրադարձել է Հայաստանի վարչապետ Նիկոլ Փաշինյանի այն հայտարարությանը, թե Երևանը դեմ չէր լինի ՀԱՊԿ-ից հեռացվելուն:

Կրեմլի ներկայացուցչի խոսքով՝ եթե Հայաստանը գտնում է, որ այդ կառույցն այլևս չի բխում իր ազգային շահերից և անվտանգության ապահովման կարիքներից, ապա երկիրն ազատ է ինքնուրույն որոշում կայացնել և լքել կազմակերպությունը:
Միևնույն ժամանակ, Պեսկովը զգուշացրել է, որ Եվրամիությանն անդամակցելու հայտ ներկայացնելու դեպքում Հայաստանը կբախվի ԵԱՏՄ-ի հետ լուրջ հակասությունների, ինչը կարող է բացասաբար անդրադառնալ երկրի տնտեսության վրա: Նա ընդգծել է, որ ԵՄ ստանդարտներին սեփական օրենսդրությունը համապատասխանեցնելու անհրաժեշտությունը հակասում է ԵԱՏՄ-ում գործող միասնական կանոններին: