Հայաստանի Հանրապետության կառավարությունն իր այսօրվա նիստում որոշում է կայացրել 6 ամիս ժամկետով արգելել տոմատի մածուկի ներմուծումը Հայաստան:

Հատկանշական է, որ սահմանված արգելքը տարածվում է ինչպես երրորդ երկրներից, այնպես էլ ԵԱՏՄ անդամ պետություններից տեղափոխվող ապրանքատեսակի վրա։

Ինչպես հայտնում է «Սպուտնիկ Արմենիան», որոշման ընդունումը պայմանավորված է տեղական արտադրողներին և գյուղացիական տնտեսություններին աջակցելու անհրաժեշտությամբ։ Նախագծի հիմնավորման համաձայն՝ ներմուծման ժամանակավոր սահմանափակման շնորհիվ ակնկալվում է տեղական արտադրության տոմատի մածուկի իրացման ծավալների աճ, ինչն իր հերթին կբարձրացնի լոլիկի պահանջարկը ներքին շուկայում։ Արդյունքում նախատեսվում է ապահովել մթերման համար առաջարկվող լոլիկի բերքի ամբողջական իրացումն ու մթերումը՝ կանխելով գյուղացիական տնտեսությունների հնարավոր կորուստները