Վարչապետի որոշմամբ գեներալ-մայոր Դավիթ Սանամյանը ազատվել է ՀՀ ԱԱԾ տնօրենի տեղակալի պաշտոնից:

 Սանամյանի հիմնական պատասխանատվության ուղղությունը ԱԱԾ Սահմանապահ զորքերի համակարգումն ու վերահսկողությունն էր։

Նրա պաշտոնանկությունը հաջորդում է անցած շաբաթ Սյունիքի մարզ ադրբեջանցի զինծառայողի ներթափանցմանը, երբ  Շաքի գյուղի տներից մեկում  կրակել էր տանտիրուհուն: Դեպքը տեղի էր ունեցել կնոջ երկու երեխաների ներկայությամբ:

Նասիմի Մուսաևը ուրբաթ օրը կալանավորվել է  սահմանը ապօրինի հատելու, զենքի մաքսանենգության, զենքի գործադրմամբ առողջությանը ծանր վնաս հասցնելու, հրազենի ապօրինի շրջանառության և բնակարանի անձեռնմխելիությունը խախտելու հոդվածներով:

Նա, ըստ Բաքվի, Լաչինի զորամասը ինքնակամ լքել է սեպտեմբերի 26-ին: Երևանի ու Բաքվի պաշտոնական պարզաբանումներից պարզ չի դառնում, թե կոնկրետ երբ է զինծառայողը հատել Հայաստանի սահմանը ու քանի օր է շրջել Սյունիքում՝ նախքան հոկտեմբերի 1-ին ձերբակալվելը: