Իրավապահ մարմինների կողմից իրականացված խուզարկության արդյունքում Նարեկ Կարապետյանի բնակարանից որևէ իր, առարկա կամ փաստաթուղթ չի առգրավվել։

Լրագրողների հետ զրույցում Կարապետյանը չի բացառել իրադարձությունների հետագա զարգացումը՝ նշելով, որ ՀՀ գլխավոր դատախազ Աննա Վարդապետյանը կարող է միջնորդությամբ դիմել Ազգային ժողով՝ իրեն պատգամավորական անձեռնմխելիությունից զրկելու նպատակով։

«Փաստորեն, արգելվում է քաղաքականությամբ զբաղվել, և տեղի ունեցող իրադարձությունների պատճառը հենց քաղաքական գործունեությունն է»,- հայտարարել է նա։

Անդրադառնալով արտաքին քաղաքական խնդիրներին՝ Կարապետյանը նշել է, որ ՀՀ վարչապետ Նիկոլ Փաշինյանը Հայաստանի համար նոր թշնամի է ձևավորում՝ ի դեմս Ռուսաստանի Դաշնության։ Նրա գնահատմամբ՝ այդ գործընթացն իրականացվում է ժողովրդի հաշվին, մինչդեռ երկրի ղեկավարը շարունակելու է տեղաշարժվել անվտանգության աշխատակիցների ուղեկցությամբ։ Կարապետյանն ընդգծել է նաև, որ միջազգային հարաբերություններում անթույլատրելի է առաջնորդվել էմոցիոնալ մոտեցումներով։ (Տեսանյութը՝ Aysor.am-ի կայքից)